Böd Fönig (löl)

In paradagad, dis bim nolama, rosadabimül ästanon; is, in rosad balid, böd pämoton, kel me flitam okik äkanon zilälön ko lit e kela köls äbinons stunidabiks, kela kanitam äbinon magifik. Ab ven jiel Eva äsesleitof fluki nolama, ven of e hiel Adam päsemofons se gad el Eden, täno de gläv flamöl keruba spag äfalon ini näst böda ed äfilidon oni. Böd ädeadon in flam, ab se nög glutöl böd nulik ä soalik, Fönig, ai soalik äfliton. Konäd sagon, das böd et labon nästi okik in Larabän ed ün yel alik tumid fifilükon oki it in näst okik, ed Fönig nulik, soalik in vol, sefliton se nög glutöl.Böd fliton zü obs, vifik äs lit, stunidabik dub köls okik, magifik in kanitam oka. Ven mot seadof len klädöm cila, böd komädon näi kapakusen e flapon me flitäms okik, jüs zü kap cila nidasirk pafomon. Fliton travärü cem misera, e tän us solalit reigon, täno klotabog miserik geton smeli violas. Ab böd Fönig binon noe böd de Larabän, abi fliton in nid nolüdalita sus fels gladik Lapäna, bunilon i bevü flors yelovik ün hitüp brefik Gröneäna. Bevü klifs kuprinagik di Fahlun ed in kolatameinäds Lingläna liloy flapami flitämas onik, e fliton sus plekabuk in nams vobana. Su bled lotuta mofon vati saludik de flumed ela Ganges, e logs jipula Lindänik litikons, ven logof oni. Böd Fönig it! No sevol-li oni, bödi parada, svani saludik kanitama? Su luvab ela Tespis äseadon äs rab spikotälik ed äflapon me flitäms blägik lefatofik. Sus hap kanitana Lisladeänik honed redik tonädik böda äslifon; su jots hiela Shakespeare äseadon äs rab hiela Odin ed ävisipon ome ini lil: nendeadöf. Dü zäl kanitanas äfliton travärü lecem kavidanik di Wartburg. Böd Fönig it! No sevol-li oni? Äkaniton ole eli Marseillaise, ed ol äfanol plümi, kel isefalon se flitäms onik; äkömon in nid paradik, ed ol ba ädeflekol oli de on ed äflekol oli lü spär, kel äseadon ko goldam su flitäms. O böd paradik, altumyelo panululöl, in flams pamotöl ed in flams deadöl, magod olik lagon in frem goldik in lecems liegikanas, du ol it, suvo pölagliböl ä soalik, flitol usio e dönu isio, te konäd: böd Fönig in Larabän. In gad ela Eden, kö pämotol dis bim nolama, in rosad balid, us God äkidon oli ed ägevon ole nemi verätik: poed.