El "Uncharted" päked telik pro PS3

Adelo äremob in Akihabara päkedi telik ko pled el "Uncharted" - dil balid e telid pro PS3. Memob, das büäto äremob eli "Uncharted" balid ed äjuitob oni mödo jü tim, kü PS3-cin ästuron ün timül semik. Sevoy gudiko, das do binon pled legudik, pledans mödik älabons säkädi somik in cins lönik. El Uncharted balid älabon bo pöli kaenik. Kodü etos no äkanob finükön pledami. Äpidob osi vemo. Ye sevob, das binon pled vemo gudik ed anu, kü dabükot at epubon dönu, vilob gevön one fädi nulik. Opledob oni fümo e spelob, das el PS3 no osturon atna!

Säfledolöd eli Volablud ko migäds kil

If binol lezilan ela Hardcore u Volapükaslopan, kanol anu säfledön eli
DJ VOLABLUD - Volablud ko migäds kil:

1. DJ VOLABLUD - Volablud (Dönumigäd Radionik) 3:05
2. DJ VOLABLUD - Volablud (Rigik) 5:07
3. DJ VOLABLUD - Volablud (Dönumigäd Dredatimik) 3:16

Säfledolöd is:http://www.mediafire.com/?4komk2vnd7pptdb

DJ VOLABLUD - Volablud

Prodams Volabludik

Ekö plösenob kapiti nulik in jenav nulädik Volapükamufa, sevabo musigi el Hardcore / Gabber palautöl fakipiko in Volapük e popublügöl de nu fütürio. Ejafob so panemöli "Prodams Volabludik" ed oprodob eli Hardcore as DJ VOLABLUD. Ämäniotob büo dö tikamagot jafön nemi "Ludrinan", ab po vätälam bosik äsludob ad gebön nemi votik - "Volablud", keli plidob mödikumo. Im fom at pogebon in prods musigik oba gönü Volapük. Olaboy i fädi lilön spikoti nulädik teiko in Volapük. Ya avigo opubon prod balid ön nem ot "Volablud". Stebedolsöd bosilo, obinon in el YouTube!

DJ Ludrinan ed el Gabber Volapükik

Büo no äpenob dö atos in delabuk at, ab jafob musigi ze mödiki, pato in Sperantapük. Tikamagot bal ämadikon enu in kop oba, sevabo desinob ad primön proyeki nulik ön nem DJ Ludrinan ko vödems fakipiko in Volapük. Musigastül obinon el Gabber, pasevöl id as el Hardcore ledino Nedänik. Jenöfo do binon musig pato Nedänik, ye nämon id in Litaliyän e boso in läns votik. Musig hiela DJ Ludrinan obinon klu fümiko japikum ka Zam & Zil (ibä stül binon ga votik, igo if nilon), kelis ba sevoy. Balugiko, vilob prodön musigi lemuikum ä japikumi.

Fino äkoldikos!

Alyelo binos fikulik ad sufälön hitüpi luimöfik in Tokyo dü muls ömik.Ye sis del teldegkilid setula vo senob votikami finik. Büo äbinos aldelo grads plu ka kildeg, igo neito. Klüliko atos binon nos nulik, bi alyelo binos din ot. Ab vo vilob sagön, das ven vamot donikon jü grads teldegtel, dif at binon vemo plitik. Säsun plidik oba primikon.

Dö grup in el Facebook

Dönu yel bal äpasetikon... Senob, das no äjinos mödo in Volapükamuf dü yel at, ab osteifob ad penön dönu, bi nulod bal nitedik epubon enu: in el Facebook grup Volapükik ävedon vemo jäfedik, anu dabinons us pösods plu ka 10, nog läs ka 20, ab kredob das i nulikans okömons. Ma ced obik, atos kanon lifükön Volapükamufi. Binos din vemo gudik, no-li?