Bal drinedas oba plitikünas

In Yapän dabinons pateds tel bira - bir veratik e drined, kel no binon bir, ab ye logoton äs bir e smekon tio äs bir. No ilogob büo magedi somik in läns votik, ab in Yapän atos nomon. Pated telid panemon "happoshu" e labon mödoti smalikum malta, ma sagäd binos läs ka 67%. Disein atosa binon säkäd anik tripik, ab voiko no nitedälob dö etos. El happoshu panemon id as "bir lövamaltik", kluo binos fikulik ad sagön, va binon verato bir u no. Alo binon bal drinedas oba plitikünas. Balido, fräd ona binon lövikum, e telido smek vo sümedon. Plidob ad drinön drinedi at!

Steifülobsöd-li ad penön nog balna?

Flen Deutänik Hermann esagom obe bü nelunüp, das ijuitom reidami delabuka obik. Äsäkom obe, va äjäfikob nog me penam Volapükik. Jenöfo no idunob osi sis tim semik, ab kikodo no-li? Cedob, das viloböv penön nog balna, ba atnaedo okanob fövön gudikumo. Kin sevon-li atosi? Ab sevob gudiko, kikodo ästopob. Sevabo, no äsenob Volapükamufi saidik ad givön obe mäpeti. Ye no vilob plonön. Pük milagik at meriton lestümi.

Bludasänsur in pledöm yapänik PS3

Äsä ya äpenob in nunot büik, pledob dönu eli "Uncharted" (anu binos dil balid, suno oprimob dini telid). Läbo, atna no ejenon säkäd kaenik ut, dö kel ipenob, efe sturam cina dü pledam. Atna pled lölik ägolon ze smufiko jü fin. E mutob sagön, das vo juitob oni mödo. Klu, anu pledob dönu de prim. Ab pidabiko binos säkäd votik, kel verato närvodükon obi. Binon bludasänsur. Ven äpledob pledi at balidna, äremob täno eli "Uncharted" in yapänapük. Täno blud leno äpubon. Äküpetob osi gudiko ed äleigodob pledi at ko el "Uncharted" meropik, in kel klüliko blud binon logädik äs in pleds somik. Ab no in pled yapänik. Äsuemob, das äbinon sänsur. Ibo atna eremob eli "Uncharted" meropik ko spel, das valikos öbinon gudik. Ab no, liedö! Blud dönu pesänsuron! Atos binon vemo fopik, ibä dü dunot valikos logoton muadiko. Klu äsukob pläni ed etuvob oni - sänsur binon ya in pledöm it! If labol eli PS3 yapänik, täno no veütos, va pledol pledi yapänik u meropiki, bi pled memosevon cini yapänik e koedon oni sänsurön bludi. Säkäd suemik tefon samo pledi votik: eli Resistance ("Tadunam", dil balid - "Fal Mena"). Ob ed i pledans votik säkobs: kis binon-li siäm sänsurama somik fopik? Binobs daülans e vilobs juitön pledis gudik, kikodo dunoy-li fopi somik, plüo das el Uncharted no binon tu mäpetik? Läbo el "Uncharted" binon pled vemo jönik magodo e to sänsur et fopik ye juitob pledi at.

El "Uncharted" päked telik pro PS3

Adelo äremob in Akihabara päkedi telik ko pled el "Uncharted" - dil balid e telid pro PS3. Memob, das büäto äremob eli "Uncharted" balid ed äjuitob oni mödo jü tim, kü PS3-cin ästuron ün timül semik. Sevoy gudiko, das do binon pled legudik, pledans mödik älabons säkädi somik in cins lönik. El Uncharted balid älabon bo pöli kaenik. Kodü etos no äkanob finükön pledami. Äpidob osi vemo. Ye sevob, das binon pled vemo gudik ed anu, kü dabükot at epubon dönu, vilob gevön one fädi nulik. Opledob oni fümo e spelob, das el PS3 no osturon atna!

Säfledolöd eli Volablud ko migäds kil

If binol lezilan ela Hardcore u Volapükaslopan, kanol anu säfledön eli
DJ VOLABLUD - Volablud ko migäds kil:

1. DJ VOLABLUD - Volablud (Dönumigäd Radionik) 3:05
2. DJ VOLABLUD - Volablud (Rigik) 5:07
3. DJ VOLABLUD - Volablud (Dönumigäd Dredatimik) 3:16

Säfledolöd is:http://www.mediafire.com/?4komk2vnd7pptdb

DJ VOLABLUD - Volablud

Prodams Volabludik

Ekö plösenob kapiti nulik in jenav nulädik Volapükamufa, sevabo musigi el Hardcore / Gabber palautöl fakipiko in Volapük e popublügöl de nu fütürio. Ejafob so panemöli "Prodams Volabludik" ed oprodob eli Hardcore as DJ VOLABLUD. Ämäniotob büo dö tikamagot jafön nemi "Ludrinan", ab po vätälam bosik äsludob ad gebön nemi votik - "Volablud", keli plidob mödikumo. Im fom at pogebon in prods musigik oba gönü Volapük. Olaboy i fädi lilön spikoti nulädik teiko in Volapük. Ya avigo opubon prod balid ön nem ot "Volablud". Stebedolsöd bosilo, obinon in el YouTube!