Thursday, September 2, 2010

Drinedibötädöp gladik

Hitüp ayelik binon lehitik in Yapän. Noe vamot aldelik rivon gradis za kildeglulis, abi, äsä sevoy osi gudiko, luimöf luta ai binon vemo geilik, sekü atos mens sufons in stad somik. Ye dabinon plad bal in Ginza uto, kö kanoy juitön nifüpi. Binon bötädöp binü glad - bötädöp no tugretik, ab i nekösömik. Vamot ninik binon grads lul donü ser e dunetäbs mutons lenükön klotis patik nifüpik. Klüliko getoy onis in bötädöp. Poso kanoy seidön oki in klots et len tab gladik, getoy i väri gladik ko drined - kanoy välön lalkoholeriki u nelalkoholeriki. Aldeliko pösods za teltums visitons pladi et, nino kanons seadön mens za kildegs - no fümob, bi no ävisitob bötädöpi et, ab äreidob seimo dö atos. Bötädöp gladik pamaifükon de düp kilid poszedelo jü neit. If pösods mödik stebedons in stebedöp, no kanoy seadön tulunüpo, atos bo muton binön neplu ka düp bal. Äsä äpenob, no nog ävisitob pladi et, ab ogolob bo seimüpo usio ad logön pladi somik. Ye mutoy i sagön, das bötädöp gladik no binon maged yapänik. Dabinons mödiks in vol, in zifs gretik difik.