Jikanitan vemo famik in Yapän, jiel Utada Hikaru bäldotü yels 27, änunof in delabuk bevüresodik oka, das primü yel okömöl, onecalikof se vol musigik pro tim semik, no nog pesludöl. Atos sinifon, das vilof gekömön seimikna lü kanitam, ab nu desinof ad takädön boso e klemön büsidi. Äsä sagof, vilof studön dinädis nulik, dedietön timi mödikum pro dinäds privatik e seivön voli gudikumo. Sagof, das kod atosa no binon mat u maläd, balugiko vilof takädön e madikön. Jiel Utada Hikaru binof levemo famik in Yapän, i boso plödü Yapän, pato bevü löfans so panemöla "j-pop". Jikanitan ädabükof tonodasirkotis lunapledik lul yapänapüko, kils linglänapüko, konletis tel sirkotülas balatik ed elis DVD mödik.
Ekö sirkotüls lunapledik yapänapüko:
"Löf balid" (1998)
"Fagot" (2001)
"Flumed dibik" (2002)
"Loveblöv" (2006)
"Ladastajon" (2008)
e sirkotüls lunapledik linglänapüko:
"Jeragikos" (1998)
"El exodus" (2004)
"Ekö at" (2009)
Utada Hikaru inunof dö desin okik avigo ün mudel, e pos nunam et ägetof visitis balion in delabuk okik dü düps te teldegfol. O milag kion! Fino, äsagof: "Ogekömob madikum".
2 comments:
Glidis dönu, o flen! Vilob säkön oli sis ven spikol-li Volapüki ed if ai espikotol oni ko votikan (in vög)? Ven penol lartügi ka aton, lio vifiko penon-li oni? Gebol-li mödo vödabuki?
Ob, äs esagon ole, esteifülob primiko ad gudükön vifi oba, so aton binon kod pro kel somna mekob pölis. Ab kanob penön (e spikön) saido vifiko. Onitedol-li in obs kosspikotön in Volapük love program äs Skype?
Frenoviko,
Radu
Gespikü säk ola - binob Volapükan sis yels jöl ü züls (if memob gudo). If ologol Volapükalisedi
elas Yahoogroups se yel 2002, otuvol nunis obik, kelis äpenob ya ettimo. Ye no älabob pöti ad spikön vögo ko pösods votik. Cedob, das üfü spikam dö yegäds aldelik, kösömik ä valemiks, kanob spikön vifiko e no neodob vödabuki. Ye üf yegäd binonöv nolav, kaenav u votiks yegäds calik, ba binosöv boso fikulikum ad tuvön sunädo in kap vödis calik.
If otuvobs timi, kanobs spikön in Volapük seimüpo, ba i Volapükans votik okanons steifülön.
Post a Comment