Tuesday, September 27, 2011

DJ Ludrinan ed el Gabber Volapükik

Büo no äpenob dö atos in delabuk at, ab jafob musigi ze mödiki, pato in Sperantapük. Tikamagot bal ämadikon enu in kop oba, sevabo desinob ad primön proyeki nulik ön nem DJ Ludrinan ko vödems fakipiko in Volapük. Musigastül obinon el Gabber, pasevöl id as el Hardcore ledino Nedänik. Jenöfo do binon musig pato Nedänik, ye nämon id in Litaliyän e boso in läns votik. Musig hiela DJ Ludrinan obinon klu fümiko japikum ka Zam & Zil (ibä stül binon ga votik, igo if nilon), kelis ba sevoy. Balugiko, vilob prodön musigi lemuikum ä japikumi.

Sunday, September 25, 2011

Fino äkoldikos!

Alyelo binos fikulik ad sufälön hitüpi luimöfik in Tokyo dü muls ömik.Ye sis del teldegkilid setula vo senob votikami finik. Büo äbinos aldelo grads plu ka kildeg, igo neito. Klüliko atos binon nos nulik, bi alyelo binos din ot. Ab vo vilob sagön, das ven vamot donikon jü grads teldegtel, dif at binon vemo plitik. Säsun plidik oba primikon.

Saturday, September 24, 2011

Dö grup in el Facebook

Dönu yel bal äpasetikon... Senob, das no äjinos mödo in Volapükamuf dü yel at, ab osteifob ad penön dönu, bi nulod bal nitedik epubon enu: in el Facebook grup Volapükik ävedon vemo jäfedik, anu dabinons us pösods plu ka 10, nog läs ka 20, ab kredob das i nulikans okömons. Ma ced obik, atos kanon lifükön Volapükamufi. Binos din vemo gudik, no-li?